وتاروتوێژینەوە

یادی مەولودی پێغەمبەر چ واتایەك دەبەخشێت؟
سۆزێك بۆ پێغەمبەری سەروەر لە یادی لەدایكبوونیدا
   یادی مەولود یادێكی پڕ لە وانەو عیبرەتی مێژووی بانگەوازی ئیسلامیی، بگرە مێژووی مرۆڤایەتییە.. جێی خۆیەتی لە ئاست ئەو یادەو ژیانی خاوەنی ئەو یادەدا هەڵوێستە بكرێ‌‌و تایبەتمەندیی ژیانی پێغەمبەری سەردارو تەمەنی پڕ خزمەت‌و جیهادو خەباتی بخرێتەوە بەرچاو.
* یادی مەولود: یادی هاتنە دونیای هەڵگری دوا پەیامی خوایە، بۆ نەوەی ئادەمیزاد، هەتا هەتایە.
* یادی مەولود: یادی ڕزگاركارێكە كە مرۆڤایەتی لە كۆیلایەتی چەوسێنەران ڕزگار كردو بەرەو لوتكەی عیززەت‌و سەربەزی خواپەرستی بردن.
* یادی ڕابەرێكە كە لە دواكەوتووترین سەردەمدا شۆڕشێكی دژی نەفامێتی‌و دواكەوتن بەرپا كردو نەوەیەكی پێشەنگی پەروەردە كردو، ژیارو شارستانێتیەكی بێوێنەی لەسەر دەستیان پێكهێنا.
* یادی خواپەرست‌و خواناسێكە كە سەرەڕای ئەو هەموو سەرگەرمی‌و كارە گرنگانەی، بە شەو كەمێك نەبێ‌ نەدەنوست‌و لەبەر نوێژی زۆرو شەونخونی قاچەكانی ئاوسابوون.
* یادی ئەو هاوڵاتییە خەمخۆرو ئەو دراوسێ‌ بەڕەحمەیە كە هەرگیز لەگەڵ برسێتی دراوسێكەیدا بە تێری سەری نەدەنایەوە.
* یادی پێغەمبەری ئیسلام، یادی ئەو پیاوەیە كە سەرلە نوێ‌ نرخ‌و ڕێزی بۆ ئافرەت گێڕایەوە. كە ژنی لە لێواری زیندەبەچاڵكردنەوە گێڕایەوە بۆ كۆڕی حورمەت‌و سەكۆی سیاسەت‌و میحرابی عیبادەت‌و ساحەی مزگەوت‌و سەنگەری عیلم‌و زانست‌و مەیدانی جیهادو خزمەت.
* یادی ئەو مافناسە بەڕەحمەیە كە دەستی قڵیشاوی كرێكاری دەگوشی‌و خۆی‌و خوای گەورەی بە خۆشەویستی ئەو دەستە قڵیشاوانە دەزانی.
* یادی ئەو باوكە میهرەبان‌و بەسۆزەیە كە لە نوێژدا منداڵە نەوەكانی دەچوونە قەڵادۆچكانی‌و داینەدەگرتن‌و نوێژی بەلاوە بەتاڵ نەدەبووەوە؛ تا چەمك‌و واتای (مافی ڕاستەقینەی منداڵ)مان فێر بكات.
* یادی پێغەمبەری خوا  یادی ئەو هاوسەرە نەرم و بەئەمەك‌و بەڕەوشتەیە كە خۆی دەیفەرموو: لە دونیای ئێوەدا هاوسەرەكانم خۆش دەوێ‌. كە هەمیشە پاش وەفاتی خەدیجە، تەنانەت بە ناوبردنی؛ سۆزی دەجووڵایەوەو یادی دەكردەوەو چاوی پڕ فرمێسك دەبوو.. بۆ نەبێ‌؟ خەدیجە ئەو ئافرەتە بوو كە جوبرەئیل دەهاتە خزمەتی پێغەمبەرو هاوكات لەگەڵ هێنانی (وەحی) دەیفەرموو: ئەی محمد! بە خەدیجە بڵێ‌: خوای گەورە سەلامت لێ‌ دەكات!
* یادی پێغەمبەری خوا یادی ئەو سەركردە سەركەوتووەیە كە ئازادییەكانی پاراست‌و كۆمەڵگەیەكی نمونەیی وەك مەدینە لە بواری هاوژیانی‌و ئازادییدا پێك هێنا.
* هەروەها یادی موجاهیدێكە كە هەموو تەمەنی بە جیهادی بانگەوازو گەیاندنی پەیامی خوا بردە سەر، كاتێكیش كە دوژمنان پەیمانەكانیان شكاندو پیلانیان گێڕا، ئاشتی‌و ئازادیی‌و ئاسایشیان تێكداو ڕێیان لە گەیاندنی پەیمانی خوا گرت، هەر ئەو بوو كە بە گژ ستەمكاراندا ڕۆشت‌و لەو مەیدانەشدا نموونەی ئازایەتی‌و خۆڕاگریی‌و لێبڕان‌و ڕووبەڕووبوونەوە بوو.
* یادی پێغەمبەری ئیسلام یادی كەسێكە كە ماناو ئیعتباری بۆ ژیان گێڕایەوە، كە وەڵامی پرسیارە سەخت‌و ئاڵۆزەكانی دایەوە: لە كوێوە؟ بۆ كوێ‌؟ تا كەی؟ لەبەرچی؟ یادی كەسێكە كە فەلسەفەی هاتنە دونیای بۆ مرۆڤایەتی ڕوون كردەوە.. كە حیكمەتی دروستبوونی مرۆڤ ‌و ژیان‌و بوونەوەری فێری خەڵكی كرد.
* یادی سەروەرێكە كە چەندینی وەك سەلمانی فارسی‌و بیلالی حەبەشی‌و صوهەیبی ڕۆمی‌و گاوانی كوردی، شەیدای پەیامەكەی بوون‌و مژدەی ئازادیی یەكجارییان بۆ نەتەوەكانیان دەبردەوە.
* یادی پێغەمبەر یادی كەسایەتییەكە كە پەیوەندیی ئاسمانی لەگەڵ زەوی پتەوكردەوە، كە پەیامی بەرزی خوای بۆ بەندەكانی هێنا، پەیامێك كە وردو درشتی ژیانی دیاری كرد، وەڵامی هەموو گرفتێكی دایەوە، چارەی هەر گرێیەكی خستەڕوو، هەموو ڕەهەندەكانی ژیانی مرۆڤی ڕێكخست.
   ئیتر بۆ یادی نەكرێتەوە؟
   كورد بۆ یادی نەكاتەوە؟ كوردێك كە چواردە سەدەیە لە سەرچاوەی هیدایەتەكەی ئەو دەنۆشێ‌، بە نیعمەتی پەیامەكەی ئەو بەهرەمەند ئەبێ‌.. بۆ یادی نەكاتەوە؟ كە بەهۆی پەیامە پڕ لە عیززەتەكەی ئەوەوە – وەك دەیان نەتەوەی تری ڕووی زەوی- لە كۆیلایەتی‌و پاشكۆیەتی‌و بەندەپەرستی ڕزگاری كردو نرخ‌و بەهای خۆی بۆ گێڕایەوە؟
   بۆ كوردی خواناس یادی پێغەمبەرەكەی نەكاتەوە؟ كە لە سایەی پەیامەكەی ئەوو شوێنكەوتنی ڕێبازەكەی ئەودا سەدان كەڵە مەردی پێشەكەشی جیهانی ئیسلام كردو كوردیان بە نەتەوەكانی جیهان ناساند؟ بۆ یادی نەكاتەوەو بۆ نەبێتە داهێنەری بۆنەی یادی ئەو- كە لە یادكردنەوەیدا سروەی ئازادیی‌و نەسیمی خۆشەویستیی‌و چێژی برایەتی بەرهەمی تەبایی و نرخی مرۆڤایەتی دەبینێتەوە.
* ئای چەندە نامۆو غەریبن ئەوانەی بە یادی تۆ – ئەی ڕابەری بوونەوەر- بێزار دەبن؟ 
ئای چەندە بێ‌ ئینسافن ئەوانەی كە ڕێز لە هەست‌و شعوری ملیۆنەها هاوڵاتی خۆیان ناگرن..
ئەی پێغەمبەری سەروەر! با ڕۆحت شاد بێت، كە لە كەناری ئەو تاك و ئوممەتانەتدا هەزاران هەزار خواناس‌و نمەكناس‌و حەقناس بوونەتە شوێنكەوتەی پەیامەكەت‌و هەڵگری ڕێبازەكەت.. كەسانێك كە نرخت دەزانن، نرخی تۆ كە ڕەوڕەوەی ژیانی سەرزەویت گۆڕی، چەندە نەفامن ئەوانەی نازانن كە بڕواهێنان بە تۆ نیوەكەی تری مەرجی موسڵمانبوونە، كە شایەتی دان بە پێغەمبەرایەتی تۆ باڵەكەی تری شەرتی چوونە بەهەشتە.
ئەی خەڵكینە! ئەی دۆست‌و یارانی محەمەد!  كام شەریعەت هەیە لەسەر زەویدا جورئەت بكات بە قوللـەی بەرزی شەریعەتەكەی ئیسلامدا بڕوانێ‌؟ كام پەیام هەیە بتوانێ‌ شان لە شانی پەیامەكەی محەممەد بدات؟ كام قوتابخانەی فیكریی هەیە وەك قوتابخانەكەی محەممەد  خەڵكی فێری ڕەوشتبەرزیی، دڵسۆزیی، دەست ‌و دەم‌و دڵپاكی، خۆشەویستی، لەخۆبووردن، برایەتی، كردبێت.. نەك بە دروشم‌و هات‌و و هەڵڵاو گاڵە، بە كردارو ڕەفتاری بەرجەستەو نموونەیی؟!
كام بەرنامەیە هەیە وەڵامی پرسیارەكان‌و كردنەوەی گرێكان‌و ئاڕاستەی هەموو ڕەهەندەكانی ژیانی لەئەستۆ گرتبێ‌؟
مێژووی كام كەڵە مەردە وەك مێژووەكەی ئەو پڕیبێت‌ لە خەبات‌و جیهادو لێبڕان‌و صەبرو پایەداریی و ڕاستگۆیی و خەمخۆریی و جدییەت؟ 
* ناهەقی نیە بێخودی ڕەحمەتی كە وەك قومری دەناڵێنێ‌‌و وا دەبینێ‌ كە بە تیشكی نێو چاوانی محەممەد  هەزاران شێری صەفشكێن شكار كران، بە دەرخستنی قامەتی، قیامەت ئاشكراكرا.. محەممەدێ‌ كە گوڵی نەودەمیدەی گوڵشەنی نبووەت‌و دوڕڕی كەسنەدیدەی قولزومی ڕیسالەت‌و مانگی هەڵبژاردەی بورجی چەرخی عیزەت بوو..  محەممەدێ‌ كە ئەمیرو وەزیر هەموو، گەدای بارەگای ئەو بوون، دەوڵەمەندو هەژار هەموو، فیدای عیززو جاهی ئەو بوون. ئەوێ‌ كە پادشایانی سەركەش‌و بزێو فەرمانبەرداری فەرمانی بوون، محەممەدێ‌ كە مەداری ئەنبیاو حەبیبی زاتی كیبریاو تاقە سواری عەرصەیی شەفاعەتە.. محەممەدێ‌ كە پێغەمبەرێكی مومتازو تاقە سیدرەنشین بازو صاحبی سەد ئیعجاز بوو‌. بۆیە بێخود دڵ و جەرگی داخدارە بۆ لالەی نوعمانیی ئەو سەروەرەو لە خۆشیی ئەو، دەشتی عەرەبستان نادات بە هەزار جەننەت و دڕکێکی موغیلانی ئەو دەشتە نادات بە هەزار گوڵشەن. 
   ئەو وەصف و ستایشە جوانانەشە وایکردووە کە بڵێت: كاتێك جوبرەئیلی گەورە فریشتەی لای خوای گەورە وەصفی ئەو سەروەرە بكات، ئیتر بێخود یان حەسسانی شاعیر چین و لە كوێ ئەتوانن حەقی پیاهەڵدانی بدەن؟
   با بچینە خزمەتی بێخود خۆی، كە دەڵێت:
ئەی ساحەتی سەد جەننەت، دەشتی عەرەبوستانت
نادەم بە هەزار گوڵشەن، یەک خاری موغەیلانت
بۆ لالەیی نوعمانت، داغدارە دڵ و جەرگم
داغدارە دڵ و جەرگم، بۆ لالەیی نوعمانت
بێ پەڕتەوی ڕوخسارت تاریکە دڵی حیربام
بەم زەڕڕەیە بنوێنە، خورشیدی درەخشانت
بۆ سەرووی خەرامانت وەک قومری ئەناڵێنم
وەک قومری ئەناڵێنم بۆ سەرووی خەرامانت
عەقڵ و خیرەدی بردووم نەشئەی قەدەحی چاوت
پێوەندی هەوای کردووم تای زوڵفی پەرێشانت
میحرابی دڵ و جانە، هێزی دەسی ئیمانە
عەصایی خەتیبانە، شمشێری خوراسانت
بەو قیبلەیی ئەبرۆیە، ڕۆح گەر لە قەزای کۆیە
دڵ خادیمی لای تۆیە، سەر گۆیە لە مەیدانت
خاقانە گسکلێدەر، بۆ خادیمی بەرقاپیت
خوددامە بە ڕۆح قەیسەر، بۆ بانگوشی سەربانت
ئەی سەییدی مەخلوقات ئاگات لە ئیمانی بێ
ئەو ساتە کە بوو قوربان، ئەم عەبدە بە قوربانت
تۆ سیدرەنشین بازی، صاحببی سەد ئیعجازی
پێغەمبەری مومتازی، دەستی من و دامانت
قورئانی نوعوتی تۆ، خەتمی بە بەشەر نایە
بێخود چییە یا حەسسان؟ جیبریلە سەناخوانت
ئەم وتارە ساڵی (1999ز) لە كاتی سەفەری حەجداو لە تەنیشت گڵكۆی پڕ نوری پێغەمبەری خوادا (دروودی خوای لەسەر بێت) نووسراوە. دواتر لە ژماە (243)ی ڕۆژنامەی یەكگرتوودا، لە (25/6/1999ز) بڵاو كراوەتەوە.